“Сыл бастыҥ иитээччитэ — 2019” күрэх

24.04.2019

Күн аайы эрдэлээн кэлэҕин

Оҕо саас саҥалаах кыһаҕа,

Уһуйаан киэҥ аанын аһаҕын

Күннээҕи сүүрүккэ кыттыһа.

Көрсөллөр эйиигин чыычаахтар,

Чуопчаарар лыҥкынас куоластар,

Кып кыра, мап мааны күнчээннэр,

Тустаахха алмаастан күндүлэр.

Күүтэллэр эйиигин кинилэр

Күн аайы саҥаны билээри,

Бириэмэ хардыытын батыһа,

Үктэлтэн үктэли дабайа.

          “Сыл бастыҥ иитээччитэ” күрэх улуус уһуйааннарын иитээччилэрин икки ардыларыгар сыллата ыытыллар. Күрэх сыала — иитээччи идэтин таһымын үрдэтии, иитээччи сайдарыгар саҥа суолу арыйыы.
     Быйылгы күрэх Одьулуун нэһилиэгин “Күнчээн” уһуйааныгар (сэбиэдиссэй Старостина Т.В.) улуус 7 бастыҥ иитээччитин түмэн, үрдүк тэрээһиннээхтик ыытылынна. Чурапчы үөрэҕин салаатын начальнига Тамара Васильевна Павлова эҕэрдэ тылынан тэрээһини арыйда. Иитээччилэргэ сүрүн болҕомто уурулларын, идэлэрин таһымын сыллата үрдэтэллэригэр, саҥаны киллэрэн, айан-тутан үлэлииллэригэр баҕарда.

Күрэх икки түһүмэҕинэн ыытылынна: “Аһаҕас дьарыгы ыытыы”, “Маастар-кылаас”. Кыттааччылар күрэх буолуон иннинээҕи күн ким ханнык бөлөххө, хасыһынан ыыталларын эрдэ талбыттара. Дьаһалларга уһуйаан оҕолоро көхтөөх кыттыыны ыллылар. Кыттааччылар бииртэн биир сэргэх, сонун дьарыктары ыытан дьүүллүүр сүбэ болҕомтотун тартылар. Хас биирдии оҕону араас ситуацияларга киллэрэн, ураты ньымалары туттан, билии-көрүү түһүлгэтигэр умсугутан туран үлэлэттилэр.
     Түмүккэ, Чурапчы улууһун үөрэҕин үлэһиттэрин профсоюһун анал бирииһин Макарова Ольга Дмитриевна ылла (“Сулусчаан” уһуйаан, Сылан нэһ.), “Преданность профессии” анал аат — Сивцева Александра Ивановна (“Чуораанчык” уһуйаан, Маралаайы нэһ.), “Лучший педагогический опыт” анал аат — Барашкова Дария Николаевна (“Ньургуһун” уһуйаан, Хатылы нэһ.), 3 степэннээх лауреат-Карпова Нюргуяна Семеновна (“Күнчээн” уһуйаан Одьулуун нэһ.), 2 степэннээх лауреат- Батарина Елена Сергеевна (“Мичил” уһуйаан, Чурапчы нэһ.), 1 степэннээх лауреат — Гаврильева Мария Анатольевна (“Мичил” уһуйаан, Хадаар нэһ.), муҥутуур кыайыылааҕынан Слепцова Нюрбина Игоревна таҕыста (“Кэскил” уһуйаан, Чурапчы нэһ.) уонна Х республикатааҕы “Сыл бастын иитээччитэ – 2019” күрэххэ кыттар чиэскэ тигистэ.

Иитээччибитигэр Нюрбина Игоревнаҕа баҕарабыт үбүлүөйдээх республикатааҕы “Сыл бастыҥ иитээччитэ – 2019” күрэххэ  үрдүк ситиһиилэри, кырачаан ыччаттарбыт дьоһун дьон буола улаатан, төрөөбүт нэһилиэкпит, Сахабыт сирин киэҥ киэлитигэр туһалаах дьон буолан айа – тута тахсалларыгар бастакы бигэ олугу уурса тураргар, үтүө алгыс тылбытын, бастын баҕа санаабытын тиэрдэбит.